مي الغيطي لـ "في الفن": شركة ديزني ردت عليا بعد سنة من تجارب الآداء والعمل في مصر هو الأولوية

التقى FilFan.com بالممثلة الشابة مي الغيطي للحديث عن تفاصيل التحضر لدورها في "مسار إجباري" الذي عرض في النصف الأول من رمضان ومشاركتها مع شركة ديزني وأول فيلم أجنبي لها.

قالت مي الغيطي: "دور خديجة جالي لما الاستاذة نادين خان كلمتني وتحمست قوي لأنه مختلف عن أي دور عملته قبل كدة بسبب الغموض وشغفها الكبير فتحمست لدة".

مي الغيطي في مسار إجباري

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وأضافت مي الغيطي: "اتكلمت أنا ونادين خان وريم العدل عن ازاي الشخصية دي تطلع، وانها عندها شغف تجاه الحقيقة وعايزة تعرف ايه حصل لحبيبة فهي دايما متحمسة لاكتشاف الحقيقة وعندها مسئولية كبيرة تجاه انها تجيب حق بنت خالتها وتبرئ دكتور صفوت. اشتغلنا عن توضيح الغموض دة عن طريق شكلها فعملنا قصة شعر فخليناها تتكلم بشكل عفوي أو تتكلم بسرعة".

مي الغيطي

وتظهر مي بلوك مختلف في المسلسل وهي قصة الشعر، وقالت عنها: "قصة الشعر مكانتش في السكريبت، حسينا انها هتبقى خاجة حلوة لأنها هتبين الطاقة في عينيها، ساعدتني وأنا بجسد خديجة".

مي الغيطي في دور خديجة

وعن مشاعرها تجاه شخصية "حنين": "كمشاهدة، باين إن حنين (جهاد) يفرق معاها قوي شغلها ومركزة فيه فمكانش قصدها تضايق خديجة، بس اتضايقت لما علي قال انها زميلة وجهاد حسام عملت الدور دة كويس جدا".

إلى جانب نجاحها في مصر، بدأت مي الغيطي في الظهور أيضًا عالميا، وعلقت على قدرتها على تحقيق التوازن بين الاثنين: "الأولوية بالنسبة لي هو شغلي في مصر لأن أنا مديونة لشغلي هنا بأي نجاح حققته، فهي مسألة الفرص المتاحة طبعا في اختبارات آداء بتيجي طول الوقت بس بتوفقها على حسب الظروف".

مي الغيطي

وكشفت تفاصيل مشاركتها في مسلسل ديزني Kizazi Moto: Generation Fire بحلقة Stardust: "عملت تجربة أداء لديزني واستنيت سنة عشان يردوا عليا فتوقعت إنهم خلاص مش مهتمين، أعتقد المخرج أحمد تعيلب هو اللي أصر إنني أكون جزء من دة فأننا ممنونة له بشكل كبير عشانه شخص مبدع جدا ونفسي الناس تبقى عارفة اسمه أكتر فهي تجربة حلوة قوي ومبسوطة إنني جزء منها".

وتنتظر مي الغيطي بدء عرض أول فيلم أجنبي لها وهو البريطاني Due Dating الذي تقدم فيه شخصية "بيرشا"، وقالت عنه: "دوري جه بالصدفة أكتر لأنني قابلت المنتجة جيد أشا وهي كلمتني بعد أسابيع تقولي إن عندهم مشروع متحمسين إنني أكون جزء منه وكنت قلقانة لأنني مش بتكلم ببريطاني، بس هما اللي خلوا الشخصية ملائمة أكتر لمي وقدراتها وزقوني برا نقطة الراحة عشان أؤدي في فيلم كوميديا رومانسية انجليزي مختلف تماما عن ثقافاتنا وعن احنا ايه بيضحكنا".

فيلم Due Dating

وكشفت مي الغيطي عن مشروع شغلها عن الموسيقى: " بحضر لفيلم طويل مع المخرج عبد العزيز النجار ولسة شغالين عليه فانشغلت قوي بالتمثيل أكتر بس ان شاء الله أرجع تاني للغناء".

ولا تخشى مي الغيطي ان يؤثر دعمها للقضية الفلسطينية على نجاحها في الوسط الغربي، إذ قالت: "أنا في الأول وفي الآخر مصرية وكياني وهويتي أهم من أي حاجة تانية بالنسبة لي".

يعرض مسلسل مسار إجباري على منصة Watch it، والمسلسل من بطولة أحمد داش، ويضم عدد كبيرا من الفنانين، ومن أبرزهم: عصام عمر، صابرين، بسمة، ياسمينا العبد، مي الغيطي، رشدي الشامي وعدد آخر من الفنانين، وسيناريو وحوار أمين جمال، محمد محرز، مينا بباوي ومن إخراج نادين خان.